Psalms 145

Tapait Maaron pa poia tooni

Mbouŋ to tapait Maaron

Mbouŋ to David

1O Maaron, yo kinik tsiau.
Yau aat nayoor ghom, ve napait ezam pa poia tsio. Ta aazne, ve taghon taghon gha ila.

2Onoon kat, saawe isov, yau aat napakur ghom pa poia tsio.
Pale napait ezam ta aazne, ve taghon taghon gha ila.

3Yoova eeza tiina kat. Isaav ighe tapaiti, ene iduduuŋ.
Tapiri tomania ŋgar ve poia tooni, ene tiina le tiina kat.
Ighe tagham ŋgar pani, ene aat tarao mako. ^a
4Uraat ariaŋazi ve ŋgar popoia tau ughamgham zi na, tamtamon pale tisavia vaaru pa natuzŋa, ve natuzŋa pale anazi tisavia pa paaghu toozi, ve iseeŋga tauvene gha ila.

5Pale tipait ezam, ve tisavia mbonarim tiina tau ipabood ghom na.
Ve uraat tsio ŋgeretazi tau maata ite kat na, yau monmon naghamgam ŋgar pani.

6Yo utotoi tapirim ila uraat tsio ariaŋazi tau igham tamtamon tiroi. Tauta pale tisavia vaaru.
Ve uraat tsio tintiina, yau aat nasinaia.

7Poia tsio, ene tiina kat.
Tauvene tamtamon pale matazi iŋgalŋgali ve tivovotia vaaru.
Pale timbou toman lolozi poia, ve tipait ghom pa ŋgar tsio duduuŋa.
8Yoova ighamgham poghani ghiit, ve loolo isasaghatin ghiit.
I aate yavyav rekrekia mako.
Poia tooni, ene tiina kat. I loolo isaghav ghiit ariaaŋ, ve iuluul ghiit irau saawe. ^b

9Yoova ighamgham ŋgar poia pa tamtamon tisov.
Ve loolo isasaghatin gabua naol isov tau i ighur zi na. ^c
10O Yoova, gabua naol isov tau yo ughur zi na, pale tisov lolozi poia payo ve tipait ghom.
Ve tamtamon tsio tau lolozi isaghav ghom ariaaŋ na, yes pale tipait ghom pa poia tsio.

11Pale tisavia pooz tsio tighe ene gabua tiina ve poia.
Ve tivotia varum tighe yo tapirim tiina le tiina kat.

12Leso tamtamon tisov tiwatagh uraat tsio tintiina tau itotoi tapirim.
Ve tighilaal tighe pooz tsio, ene gabua tiina ve paghuuna kat.

13Pooz tsio ighengheen tauvene irau saawe.
Gabua naol isov pale tileep ila yo sambam, ve uŋgin zi taghon taghon gha ila.
Yoova itataghon saveeŋ tooni isov.
Ve uraat tooni ta naol ne, titotoi tighe i loolo isaghav tamtamon tooni ariaaŋ ve iuluul zi. ^d

14Yes tau aghezi pusukia ve tighe titap, i ikiskis zi tuŋia.
Ve tamtamon tisov tau pataŋani itatan zi na, i iuul zi, ve iit zi tizaa. ^e
15Gabua isov tau matazi yaryaare na, matazi ilatlat payo.
Saawe tau pitool zi, yo ugham lezi aniiŋ.
Yo ukaak nimam ve upan zi,
ve tisov tighan le apozi isuŋ. ^f
17Ŋgar isov tau Yoova ighamgham zi na, ene iduduuŋ mon,
ve itotoi ighe i loolo isaghav tamtamon tooni ariaaŋ ve iuluul zi.

18Tamtamon tisov tau ighe titaŋ raraini pa uleeŋ toman lolozi,
ene i ileep igharau zi ve iuluul zi.

19Ve yes tau tiroi pani ve titaghon ŋgar tooni na, isaav ighe lolozi pa gabua eta ve tighasoni pani, ene i aat ilooŋ zi ve igham gabua tana pazi.
I iloŋlooŋ taŋiiz toozi, ve iuluul zi. ^g

20Tauvene yes tau lolozi igheen tooni na, i maata pazi ve imin sigheu pazi.
Eemon zeran sasaghati, i aat ivaghamun zi tisov tilalez.
21Avog pale ipait Yoova.
Ve gabua naol isov tau i ighur zi na paam, aat tisov tipait eeza patabuyaaŋ. Ta aazne, ve taghon taghon gha ila.